[Warrington]超腍牛腩X手炒辣椒醬「淥淥麵」淥出真心味道！

「豬紅＋蘿蔔＋咖喱魚蛋吖！唔該！」記得對車仔麵嘅第一個印象嚟自沙田「冬菇亭」，學生哥放Lunch一窩蜂衝去車仔檔排隊，諗番起都好似尋日發生嘅事。因為懷緬？移英兩年半嘅我，偶然喺Warrington小區見到一個「擺街木頭車」Logo，不期然畀佢吸引，走入呢間叫「淥淥麵」嘅港式車仔麵店。

一入門，第一個感覺係高樓底格局空間感十足，黑米白色主調配搭木製餐桌，簡約舒適乾淨企理，未點餐已能享受嗰份咖啡店級嘅悠閒。Menu上除咗有車仔麵不可缺少嘅牛腩、牛筋、咖喱魚蛋，仲有相對少見嘅甜酸齋，店員話我知，韭菜餃、甜酸齋、魚肉春卷、冬菇貢丸全部自家製，豬腸新鮮唔用雪藏貨，每款餸只係£2.5至£3，有選擇困難症嘅我決定揀晒自家製配料加牛筋腩，油麵搭秘製辣醬，再貪心啲Order埋個麻辣豬耳。

香、辣、腍、滑 —— 一碗齊晒！

車仔麵一放上枱，牛腩濃香陣陣撲鼻，牛筋牛腩腍到入口即溶，豬腸超級入味，越咬越香，至於甜酸齋麵筋軟滑，甜酸度適中，冬菇貢丸亦爽口彈牙。鍾意食辣嘅就一定要試試自家秘製辣醬，雖然辣度十足，但唔係死辣嗰種，而係辣得有層次、有香氣又唔嗆喉，係嗰種加少少落去，會令成碗麵再昇華一級嘅辣醬。最後試埋麻辣豬耳，有咬口之餘脆得「咔啦」聲，£5.5一碗價錢相宜，值得一試。

多得車仔麵背後嘅女人

忍唔住問老闆，點解牛腩同牛筋可以煮得咁腍？佢話牛腩同牛筋都要Over Day隔日處理，成個過程要煲、要浸，到第二朝開舖再煲、再煮，認真係好嘢唔急得，好味要時間換。至於秘製辣醬亦係真‧手工熬製，用幾款辣椒試配，即使炒辣椒時係咁彈油，甚至炒到手臂紅晒，佢哋都會堅持炒出自家獨有味道。

落足苦功，全因老闆娘太鍾意食，對每款食品唔止鑽研十幾種唔同做法，為咗完美，唔係試足十次、煮足十晚，而係煮到最滿意為止，「將自己最鍾意嘅整俾人食」，因着呢份心意，最新推出咗麻辣米線，「米線控」不妨嚟試吓老闆娘嘅私心之選。

街坊撐街坊 成就溫情小店

談話當中，老闆多次感激一眾街坊食客，唔少熟客唔止幫忙傳口碑，而且用心俾咗好多意見，老闆話不論係讚賞或批評，都會照單全收，不斷改進：「如果唔係啲街坊咁錫我哋，唔會走到今日。」呢種互相扶持嘅感覺，可能就係香港人最懷念嘅人情味。

以前諗起車仔麵，我會諗起童年回憶，依家諗起車仔麵，我會諗起堅持同真心，「淥淥麵」，推介俾同樣擁有一份堅持嘅你。

🍽️必試：牛腩、牛筋、豬腸、甜酸齋、麻辣豬耳
地址：66 Albert Rd, Widnes WA8 6JT
商戶詳情：https://www.linkuhk.com/listing/淥淥麵-66noodle/