Tag: #LinkUHK #英國生活 #PopeFrancis #天主教 #梵蒂岡 #復活節 #宗教新聞 #全球哀悼 #教宗離世 #天主教

天主揀選咗今日 — 全球天主教徒復活節哀悼 Pope Francis 【LinkUHK新聞】由梵蒂岡到菲律賓，全球天主教徒喺呢個復活節星期一，一齊向教宗Pope Francis告別。呢位天主教精神領袖喺呢個對教徒而言極其重要嘅日子中辭世，令全球信眾陷入深深悲痛。 教宗Francis喺復活節星期日仍然出現喺St Peter’s Square，向萬千信眾發表講話。喺佢去世前唔夠24小時，佢仲堅持完成佢生前最後一次公開使命，為信眾送上復活節祝福。 呢個時機並非巧合，好多教徒深信係上帝特意揀選咗呢一日。「佢揀咗基督教最美麗嘅一日——冇可能有更好嘅選擇，」來自西班牙嘅Salesian神父Father Sergio Codera講道。 佢補充：「復活節係基督徒最重要嘅慶典，我哋慶祝死亡唔係終結。就喺今日，天主揀咗Pope Francis與祂相見。」 喺Vatican，現場目擊教宗最後公開露面嘅信徒仍難以置信。「好震驚——我哋昨日仲見到佢出席復活節彌撒，接受佢嘅祝福，」一位身處St Peter’s Square嘅男子向BBC表示。 另一位婦女話：「佢對信徒非常有責任感——即使身體咁唔舒服，佢仍然堅持出席復活節彌撒，親自向大家發言。」 同一時間，遠喺亞洲嘅Manila，菲律賓首都響起一陣陣教堂鐘聲。成千上萬信眾進入教堂祈禱同默哀，表達對教宗Francis離世嘅哀悼。 Costa Rica等地亦舉行咗紀念儀式，信眾以唱詩、祈禱方式悼念教宗，回顧佢一生對教會同社會嘅貢獻。 教宗Francis自2013年當選以嚟，一直以簡樸作風示人，推崇憐憫、公義同包容。佢曾講：「教會唔應該只係一個宗教機構，而應該係醫院，照顧靈魂同心靈創傷。」 佢對移民、氣候變化同弱勢社群發聲，令佢成為21世紀最具影響力嘅宗教人物之一。 而家，全球天主教徒都喺悼念同感恩中回望佢為教會奉獻嘅歲月。雖然失去咗一位慈悲嘅領袖，但佢嘅精神仍會延續喺信眾心中。 Fun fact： 1）Pope Francis 係史上首位來自美洲嘅教宗，出身於阿根廷布宜諾斯艾利斯。 2）佢喺2013年成為教宗，接替辭職嘅Benedict XVI。 3）佢長年致力推動貧窮議題、氣候變化同宗教間對話，被譽為「人民教宗」。