JDD 上弦港台小食

Oxford outdoor market 市集好多不同國家的美食，中日台泰意大利印度等等，真係講得出嘅都會有，要突圍而出都唔容易。JDD上弦以鹽酥雞台式小食做主打，好多客人都因此慕名而來，所以次次來都人頭湧湧。

招牌菜：
正宗台灣滷肉飯⭐️⭐️⭐️⭐️⭐️必試
爆滿滷肉嘅滷肉飯£9.5, 份量好多。唔止滷肉多，飯量都好多，仲有滷蛋及旺菜。依個份量無得輸。最重要係滷肉的味道同台灣食嘅係一樣架，用左上等五花肉切粒，肥瘦均勻，滷得又淋又入味。甜鹹適中，滷蛋都好入味，十足十台灣嘅鐵蛋。滷肉嘅香氣好送飯，真係想同老闆講「唔該，多碗白飯」

火炙燶邊叉燒蛋飯⭐️⭐️⭐️⭐️⭐️
無諗過係市集都會食到咁高質嘅叉燒蛋飯。廚師即場火炙叉燒，可見廚師對食物嘅質素有着好高的要求。叉燒的味道有別於傳統港式叉燒，調味係廚師精心調配，無添加無味精獨門配方，加上火炙的燶邊脆脆口感，媲美香港五星級酒店嘅黯然銷魂飯。

台式鹽酥雞⭐️⭐️⭐️⭐️⭐️
依家鹽酥雞暫時係係英國食過最正宗台灣味道，鹽酥雞嘅調味十足十台灣市集食到嘅一樣，仲有香脆羅勒葉，真係唔係度度有。份量亦好多，雞肉juicy, 就算雞胸肉都唔會好鞋口。即叫即炸，熱辣辣。

西瓜荔枝梳打⭐️⭐️⭐️⭐️⭐️
推介西瓜荔枝梳打，即叫即打西瓜汁，配上香甜荔枝香，仲有梳打汽水嘅soda 氣。飲過咁多款cocktail, 依個配搭清爽解渴得黎帶出荔枝清香，無諗過成個配搭係咁match! 非常好飲!