[Altrincham] 主打韓式料理Memories Cafe Bar

位於Altrincham Town Center嘅Memories Cafe Bar，地理位置極為便利，從火車站行數分鐘便到達。餐廳環境舒適，共有兩層空間，並設有戶外座位同 bar 枱，非常適合朋友聚餐或者輕鬆小酌。

餐廳以韓式料理為主打，韓牌菜式包括：韓式炸雞，韓式炒粉絲，韓式辣炒年糕，蒜香豬肋骨。

「Korean Fried Chicken 韓式炸雞」🍗
小篇分別試咗Korean Spicy 韓辣同Mustard Honey 🍯 蜜糖芥末兩款口味。韓辣味道香甜微辣，令人一試難忘；而蜜糖芥末則甜中帶香濃芥末味，醬汁均勻地鋪在金黃酥脆嘅雞件上，外脆內嫩，非常惹味。

「Stir-Fried Glass Needles with Beef 韓式牛肉炒粉絲（Japchae）」

口感彈牙不黏糊，鮮嫩牛肉搭配蔬菜、香菇、蛋同微甜嘅醬汁，帶有陣陣麻油香，整體口感層次豐富。

「Tteokbokki 韓式炒年糕」

韓式炒年糕係我最欣賞嘅一道菜式，可以話係水準之作，味道分為辣與唔辣，店主特意選用創意形狀年糕，使其口感軟糯、極其掛汁，裏面配有魚糕同蔬菜，表面鋪滿香濃芝士，份量十足。

「Garlic Pork Ribs 蒜香豬肋骨」
另一推介係蒜香豬肋骨，肉質軟嫩容易脫骨，蒜香四溢，其鹹香味道令人口味。

除咗招牌菜之外，我地仲試咗韓式飯卷（Kimbap），同埋好啱打咭嘅Liquid Tiramisu 、Iced Chocolate。

「Gimbal韓式飯卷」
韓式飯卷表層灑上香氣撲鼻嘅芝麻，以口感柔軟嘅米飯包住豐富嘅蔬菜、牛肉同雞蛋，每一口都食到唔同食材嘅層次感，而且飯卷包得紮實緊緻，唔會一咬就散。特別嘅係店主為免飯經冷卻後變得乾硬，所以特意保持飯卷嘅溫熱，飯卷細節位處處用心，值得一試。

「Liquid Tiramisu」
Liquid Tiramisu 顧名思義係一杯帶有Tiramisu風味嘅飲品，賣相別具心思，在香滑cream cheese上散滿可可粉，杯上掛著酥軟手指餅，口感滑順帶有淡淡酒香，飲用前先用手指餅輕拌勻，味道會更好。

「Iced Chocolate 凍朱古力🍫」
Iced Chocolate賣相非常吸引，好啱打咭影相，店主用香濃朱古力醬，造成唔同款式嘅創意造型公仔放入杯內，使其香濃幼滑，甜度恰到好處。

總括而言，Memories Cafe Bar 在食物質素、氣氛與服務上皆表現出色，係值得一訪再訪嘅餐廳。無論是韓式料理愛好者，或只係想搵個舒適地方同朋友小聚，都十分推薦一試。

Credit: 食評 by hailey

Memories Cafe Bar
地址：2b Cross St, Altrincham WA14 1EQ
商戶詳情：https://www.linkuhk.com/listing/memories-cafe-bar-2/